لمن يحب عدن بجد

يتحفنا البعض بخوفه على عدن وشوارع عدن و (كامبات ) عدن وحجار عدن وأشجار عدن وسماء عدن, كل ذلك جميل ورائع ولاكن عندما تساله عن توفر أساسيات الحياة في حبيبته عدن ,يقلك الشباب خربو...الشباب حرقو ...الشباب دمرو ... الشباب كسرو ... الشباب بلا ادب... الشباب جن ... , أذا رجعت قلت له فين النظافه في عدن يقلك من فين عاد في نظافه , طيب فين الصحه يقلك روح شوف المستشفيات الزباله طيب والامن يقلك كمان مافي امن ولا أمان تساله عن التعليم يقلك مدمرر ومنتهي والمدارس خرباانة ,طيب والكرامة يقلك مدعوسة ترجع تسأله عن الحرية والعدل يقلك مافيش من فين تحصل عدل ......لحد الان صااحبنا ماشي تمام ترجع تقله والكامبات يرجع يقلك الشباب خربو ... الشباب حرقو ... الشباب دمرو ... الشباب كسرو ...الشباب بلا أدب ... الشباب جن ... العيال خربو عدن وحرقو الاشجار وفكو حجار الرصيف ودوخو بنا بالدخاخين هذولا ومايحبوش عدن, الان أشتي أعرف اللي خرب عدن هو الي قتل ودمرر وأنهى أساسيات الحياة في عدن واللي هي أساسيات الحياة في أي مجتمع ولا اللي خرج يقول لا للظلم لا للتهميش ونعم لعودة عدن دولة من جدبد؟...فكر قبل تجاوب إذا كانت أعمدة الانارة وأحجار الرصيف وأشجار الطرقات اللي ضحك علينا بهم نظام علي عبدالله صالح وكان يزين عدن فيهم وياريت عشانا لكن عشان الشماليين لما ينزلو البحر بالعيد ولا عشان الخليجيين ينزلو الفنادق والشاليهات في عدن الان كل هذه الكماليات صارت أفضل من الأساسيات اللي يخرج الشباب وينتفضو من اجل ترجع الأيام الجميلة لعدن واللي الكل يبكي على هذيك الأيام.
وبعدين أصلا لو باقي شي جميل وعدني في هذي المدينة قولو لي لانه كل شي ينهار بسبب هذا الاحتلال العفن وبسبب ..
1- طمس الهوية .. 

2-وقله الوعي ..

3- ومحد يتكلم الا على الشباب الي إذا خربو شي أو كسروه هم عارفين انه دخيل على عدن وتاريخها اللي مش باقي منه سوى القليل واللي محد فكر فيه الا القليل من أبناء عدن.

مابتكلم كثير على قيمه الدم في عدن والجنوب . لان الي عنده شوية إحسااس وقليل دم مابيفكر بالشباب اللي قطعو الطرقات بل بيفكر بالجنود الي يقتلو الشباب وقتلو البنات وقتلو الأطفال والنساء والرجال بدم بارد وحجة قتل بشر صارت هي حجر .

طيب ميقعش ياناس ( أشتي لحمة من كبشي وأشتي كبشي يمشي ) خلونا ننظف عدن أول من الأوساخ والجراثيم وحتى لو تعبنا وخسرنا شوية كامبات وحجار واتحملنا دخان التواير بس بعدها بنرجع نبني عدن من جديد ونبني التعليم والصحه والأمن والعدل وننشر النظام ونعيد النظافة ونفتح مصنع كامبات ( عشان مايزعلش صاحبنا ) .

( عشان الام لازم نضحي بالجنين ) وياريته الجنين طبيعي إلا كله صناعي من يوم ولادته وهو معوق ومريض ومنفوخ من السريلاك ولا حتى تزعل عليه إلا لانه قطعه في عدن ولكن يضل الجنين صناعه خارجية . 

كلمتي لكم جميعا لازم تعرفو ان الشباب لما يقطعو الطرقات ويرمو الأخشاب والأحجار ويشعلو النيران في التواير , وأحيانا يفكو الكامبات وأحجار الرصيف هم عارفين إن هذا مش صح وان هذا دمار ولكن ماباليد حيله دام الكل يتفرج على جنود الاحتلال يبطشو والناس تموت والمدرعات توصل لجنب بيوتنا ما معانا الا نحمي انفسنا ونحمي بيوتنا ونحمي اطفالنا ونسائنا من القتل ونحن بدون سلاح .

وفي الاخير اللي يحب عدن لا يسكت على الظلم الممنهج والمقصود اللي استمر سنوات وسنوات ومازال ولا يترك الأهم ويركز على الشباب الي يعبر عن غضبنا جميعا ضد هذا اللي كلنا نسميه احتلال همجي عنصري وكل جنوده شرابين للدماء الجنوبية وبالذات أشبال الجنوب .

وإذا شفتو ثورة سلمية تنفع مع هذا الاحتلال الدموي . أكتبو للشباب عنها وخلونا نستفيد لأنه أكثر من هذه السلمية معاد تنفع مع هؤلاء الهمج القتلة .